میڈیا رپورٹس کے مطابق عالمی خام تیل کی قیمتوں میں نمایاں اضافہ دیکھا گیا ہے۔ برطانوی برینٹ خام تیل کی قیمت 9.29 ڈالر فی بیرل کے اضافے کے بعد 101.3 ڈالر فی بیرل تک پہنچ گئی، جبکہ امریکی ویسٹ ٹیکساس انٹرمیڈیٹ (WTI) خام تیل کی قیمت 9.02 ڈالر اضافے کے بعد 96.27 ڈالر فی بیرل ہو گئی۔ ماہرین کے مطابق یہ حالیہ ہفتوں میں قیمتوں میں سب سے بڑا اضافہ ہے۔
عالمی منڈی میں قیمتوں کو کنٹرول کرنے کے لیے کچھ ممالک نے اپنے اسٹریٹجک تیل کے ذخائر جاری کرنے کا اعلان کیا، تاہم مارکیٹ میں بنیادی مسئلہ سپلائی کے خدشات ہے، جس کے باعث قیمتوں میں کمی نہیں آ سکی۔ انٹرنیشنل انرجی ایجنسی (IEA) کے مطابق امریکہ، اسرائیل اور ایران کے درمیان جاری کشیدگی عالمی تیل کی سپلائی پر اثر ڈال رہی ہے۔ اگر خطے میں کشیدگی بڑھتی ہے تو اہم ترسیلی راستے بھی خطرے میں آ سکتے ہیں، جس سے قیمتیں مزید بلند ہو سکتی ہیں۔
توانائی کے ماہرین کا کہنا ہے کہ خلیج کے خطے میں کسی بھی فوجی تنازع یا تیل کی تنصیبات پر خطرات عالمی معیشت پر فوری اثر ڈال سکتے ہیں۔ خاص طور پر آبنائے ہرمز جیسے اہم بحری راستوں میں خطرات بڑھنے سے خام تیل کی قیمتیں تیزی سے اوپر جا سکتی ہیں۔
ماہرین کے مطابق عالمی منڈی میں بڑھتی ہوئی قیمتیں دنیا بھر کی معیشتوں پر بھی اثر ڈال سکتی ہیں، مہنگائی میں اضافہ اور ایندھن کی قیمتوں میں مزید اضافہ ممکن ہے، جس سے صارفین اور صنعتی شعبوں دونوں کے لیے مالی دباؤ بڑھ سکتا ہے۔
