اساتذہ قوموں کی ترقی اور روشن مستقبل کے معمار ہیں,بخت محمد کاکڑ

کوئٹہ : صوبائی وزیر صحت بلوچستان بخت محمد کاکڑ نے یومِ اساتذہ کے موقع پر اپنے پیغام میں کہا ہے کہ اساتذہ کسی بھی معاشرے کی ترقی، خوشحالی اور فکری تربیت میں بنیادی کردار ادا کرتے ہیں۔ ایک استاد نہ صرف طلبہ کو علم فراہم کرتا ہے بلکہ ان کی کردار سازی، اخلاقی تربیت اور شخصیت کی تعمیر میں بھی اہم کردار ادا کرتا ہے۔ اساتذہ کی محنت، لگن اور رہنمائی ہی قوموں کو ترقی کی راہ پر گامزن کرتی ہے انہوں نے کہا کہ یومِ اساتذہ ہمیں ان عظیم شخصیات کی خدمات کو خراجِ تحسین پیش کرنے کا موقع فراہم کرتا ہے جو اپنی زندگی کا قیمتی وقت نئی نسل کی تعلیم و تربیت کے لیے وقف کرتے ہیں۔ اساتذہ کی بدولت بچے علم، شعور اور آگاہی حاصل کرتے ہیں اور مستقبل میں ملک و قوم کی خدمت کے قابل بنتے ہیں۔ کسی بھی قوم کی ترقی کا دارومدار معیاری تعلیم اور قابل اساتذہ پر ہوتا ہے، اس لیے اساتذہ کے مقام و مرتبے کا احترام ہم سب کی مشترکہ ذمہ داری ہے۔صوبائی وزیر صحت نے کہا کہ تعلیم اور صحت کسی بھی معاشرے کی بنیادی ضروریات ہیں اور ان دونوں شعبوں میں بہتری کے لیے تعلیم یافتہ، باشعور اور ذمہ دار نسل کی تیاری ناگزیر ہے۔ اساتذہ بچوں میں علم حاصل کرنے کا شوق پیدا کرنے کے ساتھ ساتھ انہیں نظم و ضبط، برداشت، احترامِ انسانیت اور معاشرتی ذمہ داریوں کا احساس بھی دلاتے ہیں۔ ایک اچھا استاد اپنے شاگردوں کی صلاحیتوں کو اجاگر کرکے انہیں زندگی کے مختلف شعبوں میں کامیابی حاصل کرنے کے قابل بناتا ہے۔بخت محمد کاکڑ نے کہا کہ بلوچستان جیسے وسیع رقبے اور مختلف جغرافیائی حالات کے حامل صوبے میں اساتذہ کی ذمہ داریاں مزید اہمیت رکھتی ہیں۔ صوبے کے دور دراز علاقوں میں بچوں تک تعلیم کی رسائی، تعلیمی معیار میں بہتری اور نوجوان نسل کو جدید تقاضوں سے ہم آہنگ کرنے کے لیے اساتذہ کا کردار بنیادی حیثیت رکھتا ہے۔ اس مقصد کے لیے اساتذہ کی حوصلہ افزائی، ان کی پیشہ ورانہ صلاحیتوں میں اضافے اور تعلیمی اداروں میں سازگار ماحول کی فراہمی پر توجہ دینا ضروری ہے۔انہوں نے مزید کہا کہ اساتذہ کو درپیش مسائل کے حل، ان کے جائز حقوق کے تحفظ اور انہیں باوقار ماحول فراہم کرنے کے لیے اجتماعی کوششیں وقت کی اہم ضرورت ہیں۔ اساتذہ کو معاشرے میں وہ عزت اور مقام ملنا چاہیے جس کے وہ مستحق ہیں، کیونکہ ان کی محنت کے نتیجے میں ہی ڈاکٹرز، انجینئرز، سائنس دان، محققین، افسران اور زندگی کے مختلف شعبوں سے تعلق رکھنے والے ماہرین تیار ہوتے ہیں۔صوبائی وزیر صحت بخت محمد کاکڑ نے یومِ اساتذہ کے موقع پر تمام اساتذہ کو مبارکباد پیش کرتے ہوئے کہا کہ اساتذہ کی خدمات کسی بھی صورت فراموش نہیں کی جا سکتیں۔ انہوں نے اس عزم کا اظہار کیا کہ تعلیم کے فروغ، نئی نسل کی بہتر تربیت اور ایک باشعور و ترقی یافتہ معاشرے کی تشکیل کے لیے اساتذہ کی اہمیت کو تسلیم کرنا اور ان کی حوصلہ افزائی کرنا ناگزیر ہے۔ انہوں نے کہا کہ اساتذہ کا احترام دراصل علم، شعور اور روشن مستقبل کا احترام ہے۔