انڈیا کے خبر رساں ادارے پریس ٹرسٹ آف انڈیا (پی ٹی آئی) کے مطابق سابق انڈین آرمی چیف جنرل ریٹائرڈ منوج نروانے نے آر ایس ایس رہنما دتاتریہ ہوسبالے کے پاکستان سے مذاکرات کی ضرورت سے متعلق مؤقف کی حمایت کی۔
انڈیا کی ہندو نظریاتی تنظیم راشٹریہ سویم سیوک سنگھ (آر ایس ایس) کے رہنما دتاتریہ ہوسبالے نے پی ٹی آئی کو ایک انٹرویو میں کہا تھا کہ انڈیا کو پاکستان کے ساتھ مذاکرات کے دروازے بند نہیں کرنے چاہییں اور ہمیشہ بات چیت کے لیے تیار رہنا چاہیے۔
پی ٹی آئی کے مطابق بدھ کے روز اسی خبر رساں ادارے سے گفتگو کرتے ہوئے سابق انڈین آرمی چیف نے کہا کہ انڈیا اور پاکستان کے عوام کے درمیان دوستی بہتر دوطرفہ تعلقات کا باعث بن سکتی ہے۔
ان کا کہنا تھا: ’سرحد کے دونوں جانب عام لوگ رہتے ہیں جنھیں روٹی، کپڑا اور مکان جیسے مشترکہ مسائل کا سامنا ہے۔‘
پی ٹی آئی کے مطابق جنرل ریٹائرڈ منوج نے کہا: ’عام آدمی کا سیاست سے کوئی تعلق نہیں ہوتا۔ جب دونوں اطراف کے عوام کے درمیان دوستی ہو گی تو دونوں ممالک کے درمیان بھی دوستی قائم ہوگی۔‘
