سٹیٹ بینک کی جانب سے جاری کردہ تازہ رپورٹ کے مطابق فروری 2026 کے دوران پاکستان کا کرنٹ اکاؤنٹ نمایاں سرپلس میں رہا، جسے معیشت کے لیے مثبت پیش رفت قرار دیا جا رہا ہے۔ رپورٹ کے مطابق فروری میں کرنٹ اکاؤنٹ 42 کروڑ 70 لاکھ ڈالر سرپلس ریکارڈ کیا گیا، جبکہ اس سے قبل جنوری 2026 میں یہ سرپلس 6 کروڑ 80 لاکھ ڈالر تھا۔
اعداد و شمار کے مطابق فروری کے مہینے میں پاکستان کی برآمدات 2 ارب 48 کروڑ ڈالر رہیں، جبکہ درآمدات کا مجموعی بل 5 ارب 15 کروڑ ڈالر تک پہنچ گیا۔ اس کے ساتھ ساتھ بیرون ملک مقیم پاکستانیوں کی جانب سے ترسیلات زر میں بھی نمایاں کردار ادا کیا گیا، جو فروری میں 3 ارب 28 کروڑ 80 لاکھ ڈالر رہیں۔
سٹیٹ بینک کے مطابق رواں مالی سال کے ابتدائی 8 ماہ کے دوران کرنٹ اکاؤنٹ میں مجموعی طور پر 70 کروڑ ڈالر کا خسارہ ریکارڈ کیا گیا ہے، جبکہ گزشتہ مالی سال کے اسی عرصے میں 47 کروڑ 90 لاکھ ڈالر کا سرپلس دیکھا گیا تھا۔
ماہرین کا کہنا ہے کہ فروری میں کرنٹ اکاؤنٹ کا سرپلس ترسیلات زر میں اضافے اور درآمدات کے دباؤ میں نسبتی کمی کی وجہ سے ممکن ہوا۔ یہ پیش رفت ملکی معیشت کے استحکام اور بیرونی کھاتوں کی بہتری کے حوالے سے حوصلہ افزا سمجھی جا رہی ہے، تاہم مجموعی مالی سال کے اعداد و شمار کو دیکھتے ہوئے مستقل بہتری کے لیے مزید اقدامات کی ضرورت برقرار ہے۔
