آذربائیجان کے ایران کے سرحد کے قریب واقع خودمختار علاقے نخچیوان کے ہوائی اڈے پر مبینہ ایرانی ڈرون حملے کے بعد، آذربائیجان کے صدر الہام علیئیف نے ایران کو جوابی کارروائی کی دھمکی دی ہے۔
آذربائیجان کے صدر نے کہا ہے کہ ’ایران کی جانب سے ان کے ملک کے علاقے پر آج ایک دہشت گردانہ حملہ کیا گیا۔‘
تاہم ایرانی فوج کے جنرل سٹاف نے آذربائیجان کی جانب ڈرون حملے کی تردید کی اور کہا کہ ’یہ اقدامات اسرائیل کی جانب سے مسلم ممالک کے تعلقات میں خلل ڈالنے کے لیے کیے جا رہے ہیں۔‘
الهام علی یف نے کہا ہے کہ ’آذربائیجان کی مسلح افواج کو ہدایت دی گئی ہے کہ وہ جوابی کارروائی کے لیے تیار رہیں۔‘
اس حملے کے جواب میں آذربائیجان کی وزارتِ خارجہ نے ایران کے سفیر کو طلب کیا اور وزیرِ خارجہ نے حملے کی مذمت کرتے ہوئے کہا کہ ’ان کا ملک اس حملے کا جواب دینے کا حق محفوظ رکھتا ہے۔‘
